اكطاع لعميم وامحمد ولد هدار:وهوفي الأصل ذوطابع هزلي وفيه درجة عالية من المزاح بين الأصحاب وقد يعتبره البعض مثيرا لبعض الحساسيات الجهوية أو حتى االعرقية و لكن ليس كذالك في نظري و هو أدب رفيع على كل حال .
لعميم:
هاذ الساحل ماكنت انجيه=نختيرك يمحمد عجلان
اتعرفن كيف ال فيه=يزيان ءكيف ال يشيان
امحمد
اهل تستنقص فيه اشويت=شين اشلك ماهون الجحدان
غير انت بعد ال وسيت=يعم كامل مايشيان
لعميم:
هاذ الحوت ال حس اگبيل=شد اخبار فالناس اگران
البظان اتواسيه ءكيل=ولل مخل للسودان
امحمد
الا كيف الحوت ال باد=شرگ ءذاك اص عيشت كان
الطلب هك ءعند زاد=عن هو عيشت حسان
لعميم:
آن گايل عن حوت الاه=من عيشت لطراف ءلعيان
ءذاك الحوت الشرگ والله=ماه عيشت كون السودان
امحمد
حسك گايل عن حوت لهيه=مخل للسودان اتبان
يوگ بالسودان ابلد فيه=ماينكشف فيه البظان
لعميم:
گلل عن خبر الحوت الحس=رجل هون اجول افوديان
تتارك يمحمد من لنس=ولل هو زاد امن الجان
امحمد
نسكت غير انسالك خرص=امجيج ءنبك الودان
أخير ال منهم يمتص=ولل ينگع فالگدحان؟؟
لعميم:
سولتك ينزاهت لنفاس=الخروب الكان ازيان
وشتغلت فكيل ذالناس=هي شتواس للشنبان؟؟
امحمد
اهل الشرگ الخروب الهم=عيش كل اسن عاد ءكان
مارين حد اگول الهم=ماكل اسن سنت الدخان
لعميم:
ماكال شرگ افدهر اتنوب=الشدة كون افلان افلان
والناس الاه افذ الخروب=تگطع للناس امع الجديان
امحمد
كيف امجيج الا يگطع=من حد ادبابيس امتان
ماگط اجبرت منگع=فالگدحان احمدت السبحان
لعميم:
رايغ فم اتروغ الملگط=فالودان اهل الشرگ اعيان
غير اص تتارك ماگط=راوغه يكون إمليان
امحمد
تتارك گلت انه ونٌ=معهودة لِمليان اتبان
ول امل كليلَ ظنٌُ=عنه معهوده للخمسان
لعميم:
لگط الشرك اسكتن عنُ=ؤلگط إلاه اسمع ذالسولان
اشيحرگ فالخرز منُ=وشماه اعل لمجابن مان؟؟
امحمد
حب آدرس امال مسكين=موكول ءملكوط اصل انهان
ومال اكلوب مكبوظين=الهم لمعارظ ودكيان
لعميم:
لعاد ال شرگ المشروط=ؤكيل ماه ؤكيل اعيان
ذ الناس الاه افذ خَيلوط=يمحمد تترافد لمدان
امحمد
حت منچاغ عار اكبير= وامصوه شرگ الفرگان
واگلوبته ينتكل غير=ماينتكل دون الترغان
لعميم:
خل عنك لخبار اتكل=انبطاص ءكيل اغْرمان
والگرزيم امن ؤكيل البل=والذانوف ؤكيل الرعيان
امحمد
آدرس ءكيل يالنزيه=افذاك الشرك من لوطان
وُكيل الكري ذمافيه=ال يعير بيه ازمان
لعميم:
يمحمد عين ادگ افعين=عن ردك وجوابك فتران
انت عندك لسن وحدين=وان ماعند كون السان
إنتهى
عدد المساهمات: 34
تاريخ التسجيل: 19/12/2009
الموقع: موريتانيا
منتدى الكناش :: كناش الأدب الحساني :: مختارات من لغن
صفحة 1 من اصل 1
صلاحيات هذا المنتدى:
لاتستطيع الرد على المواضيع في هذا المنتدى
